Qalaj: Xhelal Sveçla ka marrë aksione policore ne veri pa e pyetur drejtorin e policisë

Deputeti i PDK-së, Rashit Qalaj, ka kritikuar ministrinë e Punëve të Brendshme dhe Qeverinë Kurti për interferime në Policinë në Kosovës, gjegjësisht në hetimet që po u bëhen personave të pushtetit apo të afërt me pushtetin, transmeton gazeta "Kosova Sot Online".

Sipas Qalaj, pushteti është duke penguar hetime, siç janë me rezervat shtetërore, dhe këtë, sipas tij, po e dëshirojnë edhe raportet ndërkombëtare.

“Shemsi Haziri është ndërruar politikisht. Me mbrojt krimin, me i mbrojt njerëzit e vet të pushtetit… Kur edhe raporti i DASH-it të thotë që ndërrimi i shefit të Taskë Forcës është i lidhur me krimin serioz në Qeveri. Atëherë, kjo nuk do koment”, ka thënë Qalaj në “Five”.

Më tej, Qalaj ka kritikuar ministrin e Brendshëm, Xhelal Sveçla, se ka marrë aksione policore ne veri të vendit pa e pyetur drejtorin e Përgjithshëm të Policisë.

Dhe, sipas tij, Sveçla është duke emëruar “persona në Policisë, vetëm personat nga qyteti që vjen” dhe kështu, sipas tij, po tentohen të mbyllen rastet e hetimeve.

“Absolutisht është nga jashtë (ndikimi në Polici). Ju e dini mos t’i përsërisim gjërat në veri se si ka vepruar ministri pa e pyetur fare drejtorin. S’po dua të flas për disa gjëra, le të thonë hetimet. Tek e fundit më mirë është t’i mbrojë hetimet të mos dëmtohen. Se unë të bëj poltikë në emër të opozitës dhe të tregoj gjëra që s’du me i tregu/ që ish dashtë më i tregu. Mirëpo, për shkak të rëndësisë, i rastit të Banjkës për shembull kam vendos të hesht për momentin. Por, është me rëndësi sa më pak të preket shtylla e hetimit në Polici”, ka shtuar Qalaj.

Kështu, Qalaj ka thënë se partia në pushtet ka harruar kauzën për luftimin e korrupsionit dhe nepotizmit.

(Kosova Sot Online)